il blau tocca la terra
Davart il cuntgnü
Il blau dà il titel ed es insaina da la racolta «il blau tocca la terra». Il blau in sias diversas fatschettas, da blau s-chür a blau cler, da bod nair a bod alb e transparent, scha no ans laschain manar tras la poesia «sco l’aua» e quel blau baderlunz da l’aua aint il «bügl da plaz» chi doda tuot, sa tuot, tradischa be quai ch’el voul, sa taschair e tegner il misteri da l’utschè d’üna not per quel chi dvainta part.
Tina Planta-Vital ha cumanzà a’s preschantar sco autura ad ün public plü grond pür avant pacs ons. No tilla cugnuschaivan avant impustüt sco artista d’art figürativa. Uossa s’exprima l’amia da las culuors eir cul pled. La poesia da Tina Planta-Vital es da taimpra fina, fraischla e feminina.
No guardain tras üna taila cun parts melancolicas, cun parts da profuonda introspecziun: no gnin a cugnuoscher ün eu liric in contact intim cun sai svessa, in tschercha dal tü. Ün eu liric chi ans muossa seis stizis, sias paschiuns, sias plajas: seis cour avert, cun sguard i’l passà, cun plövgia e sulai. – Id es ün muond poetic, centrà al muond da quel eu chi ans quinta sias istorgias.
Tina Planta-Vital
il blau tocca la terra
poesias
70 paginas, lià, 27 francs
editionmevinapuorger turich 2019
ISBN 978-3-9524584-8-8
****
Tschinch poesias
per dar ün insaj a la lirica da Tina Planta-Vital
****
bramas
as zoppan
suot
la tschendra
il vent
balla
suravia
deliberadas
rivna
pro mai
****
lai nair
tia turba
tuorblainta
meis corp
as perda
aint ill’aua naira
la ritscha
nouda
cun mai
eu poss
am surlaschar
al s-chür
****
il chant
d’üna vusch
lomma
d’ün lö
spari
meis cour
cugnuoscha
la melodia
per tuornar
là
ingio cha
tuot
cumainza
****
partir
ampuas
e frajas
madüradas
al sulai
partir
vents crüjs
chi tiran
tras il minchadi
partir
il chod
da la pigna
cun romma
chattada
suot nos bös-ch
da la vita
****
sömmis
as fuan
aint illas fodas
dal s-chür
temmas
mütschan
suot let aint
peis fraids
tscherchan
il chod
dal corp