Oscar Peer

Oscar Peer (1928-2013) es nat e creschü sü in Engiadina Bassa, a Carolina, Zernez e Lavin.

Davo ün cumanzamaint da giarsunadi da serrürier, ha’l frequentà il seminari da magisters a Cuoira e stübgià romanistica a l’Università da Turich, cun sogiuorn a Paris.

Sia prüma plazza sco romanist cun promoziun ha Peer gnü a la LR, ingio ch’el ha s-chaffi il dicziunari ladin-tudais-ch (1962), per dvantar lura magister da scoula media per frances e talian a Winterthur e Cuoira. Oscar Peer es stat maridà cun Monica Peer-Fopp; illa lai sun nats ils duos uffants Simon e Leta, morts tuots duos in giuvna età.

Oscar Peer ha scrit sia ouvra narrativa suvent in duos linguas, in rumantsch e tudais-ch.

Ün leitmotiv in sia ouvra es l’isolaziun e la tragica da l’uman in sia suldüm. Da gronda importanza litterara sun las novellas Il retuorn / Akkord, La chasa veglia / Das alte Haus ed il roman autobiografic La rumur dal flüm / Das Raunen des Flusses.

La prosa cuorta ha Oscar Peer scrit impustüt pel radio rumantsch chi ha emiss seis texts cuorts ill’emischiun Impuls.

Oscar Peer vess cumpli als 23 avrigl 2023 95 ons ed es mort avant desch ons, als 22 december 2013.

Per commemorar il grond narratur ladin, es cumparüda üna part da sia prosa cuorta.

Üna postfacziun güda a situar danouv a l’autur e si’ouvra.

A man da codes QR survain il lectur access a registraziuns originalas da la vusch da l’autur barmör.

Oscar Peer

Vi da che ch’eu pens minchatant

prosa cuorta

reediziun a chüra da

Mevina Puorger e Jachen Andry

cun üna postfacziun da l’editura

Cuverta: Leta Peer

Lià, 127 paginas, 31 francs

ISBN 978-3-9525233-8-4

editionmevinapuorger 2023

il cudesch es in vendita pro la chasa editura e librarias chi vendan cudeschs runmantschs