Il piz da la corna tschanca

Jon Demarmels es creschü sü i’l ambiaint d’hotel. E là pudaina eir chattar stizis da seis muonds ün pa distachats da la realtà: ils muonds fantastics, cun apparentschas incuntschaintas chi invidan a specular. Interessant ans para la fascinaziun da Demarmels da descriver ün muond imaginà e surrealist cun figüras chi sumaglian per part a tschertünas da las tarablas. Demarmels nu’s schena da masdar il gener tradiziunal cun alch nouv e surrealist, per s-chaffir sumaglias davart las ultimas dumondas da nossa vita. In seis raquint surrealist, i’l Piz da la corna tschanca, es reuschi a l’autur quist intent tematic in fuorma compacta. Eir qua vaina, sco in seis prüm raquint Da chi ais quaista chasa (publichà be sco fögliet dal Fögl Ladin) il contact cul oter muond; i’ns vain descrit sco prüm il lavurdi e la dischillusiun, opür la rabgia dal diavel. Per gnir a bröch cun seis plont cunter il char Segner ed il tschêl, per survgnir il dret dad avair daplü influenza noscha pro l’uman, fa il diavel abüs da l’orma dad ün mort chi nu paisa avuonda per rivar in tschêl e chi perquai ha da tuornar amo üna jada sün terra, accumplind uschea sainza savair sia mischiun. Bel, ed eir insolit es cha Jon Demarmels lascha guadagnar al diavel seis plont – insè pers – cunter il tschêl. Il diavel guadogna, mo l’uman dess esser consciaint dal nosch e nu til laschar tour suraman. Il piz da la corna tschanca es ün raquint chi ans preschainta cun umur ed ironia ün viadi da tschella vart da la mort, ans dà ün purtret simpatic dal diavel, dals anguels e dad umans chi sun ormas dal diavel e buns diavels.

109 paginas,lià, 20frs.

in vendita directamaing pro la chasa editura

editionmevinapuorger