Dumenic Andry
Uondas

Davart il cuntgnü

Uondas es ün cudesch cun raquints cuorts da tematica tuottafat variada. La paletta dals motivs as basa a titels chi sun gnüts tschernüts e proponüts i'l decuors dals ons passats per l'emissiun Impuls dal Radio rumantsch. Ün text chi vain scrit per gnir dudi nun es però il listess sco ün per gnir let. L'autur ha fat üna tscherna da seis Impuls e tils ha elavurats, per part rescrits ed adattats per üna fuorma stampada. Üna gruppa dals raquints cuorts as cumpuona da paginas da satira politica-culturala, üna seguonda cumpiglia ponderaziuns filosificas-moralas ed üna terza, per part in fuorma da poesias in prosa, es da taimpra intima e persunala. Dumenic Andry dà in seis scriver spazi ed importanza a mincha dumonda chi tschercha üna reflexiun litterara: Id es sco sch'el as laschess tour pel man da la noziun rivada pro el da dadoura nan e tilla seguiss cun respet, interess e fiduzcha. Da las jadas vain quella dumonda a far plazzin in fuorma divertenta e cundida d'ironia ed umur fin; otras jadas è’la critica, mordainta e scurrila, opür eir d'üna fina melanconia poetica, in dependenza da motiv e tema in trais-cha.