Balser Puorger
La glieud da Schilana ed oters raquints

Davart il cuntgnü

Dal 1935 ha Balser Puorger (1864-1943) publichà seis raquint La glieud da Schilana, ingio ch’el descriva la gloria ed il declin da la famiglia Corradini, dinastia da grond’influenza da Sent. Il fallimaint da la banca dals Corradinis es dvantà ün tabu e vain adüna amo zoppantà. Balser Puorger descriva in seis raquint dedichà als Corradinis lur istorgia, tils nomna in seis raquint ils Corsins e tils descriva unicamaing in fuorma postivia. La vart negativa da quella famiglia transpuona l’autur a figüras fictivas. Uschea gnina a cugnuoscher ils fats istorics sainza avair cuolpabels ed achüsas, mo vain il purtret dad umans chi prouvan dad ir in buna fai lur via. Eir i’ls ulteriurs raquints chi sun gnüts tschernüts per quista nouva ediziun survain il lectur üna lecziun d’istorgia e da morala. Da manzunar es in special tanter oter Antigone in Engiadina chi ans dà ün purtret exact dals fös da Ramosch e daspera il raquint fictiv d’ün liom commovent tanter figlia e mamma, da la duonna chi pudess esser statta quella chi’d es gnüda achüsada dad avair dat fö il cumün. Barba Lurench es il raquint, ingio cha l’autur ans quinta parts da la Revoluziun francesa, our da l’optica dad ün mercenari grischun, chi tuorna davo üna lunga odissea darcheu in Engiadina Bassa e po dar inavant sco hom cultivà seis savair ch’el ha accumulà in seis ons d’emigraziun.